मोरगांवची द्वारयात्रा मुख्यतः भाद्रपद, माघ व ज्येष्ठ महिन्यांमध्यें शुद्ध प्रतिपदेपासून चतुर्थीपर्यंत करतात. परगांवाहून येणाऱ्या यात्रिकाने कोणत्याहि चार दिवशी येऊन यात्रा केली तरी चालते. पहिल्या दिवशी प्रातःकाली नित्य स्नान-संध्या-जप इत्यादि आटोपून नित्ययात्रा करावी. नंतर सद्गुरुंच्या अनुज्ञेनुसार द्वारयात्रेचा महासंकल्प करावा आणि यात्रेनिमित्त स्नान करावें श्रीमयूरेश्वराचे षोडशोपचारे पूजन करावे व पुन्हां स्नान करून पूर्वेस श्रीविष्णु देवी लक्ष्मीसह श्रीगणेशाची आराधना करीत असून ते क्षेत्राचे पूर्वद्वार अथवा धर्मोद्वार आहे तेथे चलावे. हे द्वार मयूरेशापासून ५ मैलांवर आहे. तेथील गर्भगृहस्थानीं महाबुद्धि आहे. तिच्या कृपेने गणेश-ज्ञानाची व ब्रह्मज्ञानाची प्राप्ति होते. तिथे पूजन करावें. हे ठिकाण मयूरेशापासून १ मैलावर आहे. तेथून १.५ मैलांवर क्षेत्ररक्षक नग्नभैरव याचे स्थान असून मोरेश्वर क्षेत्री भक्तांना आणणे, त्यांचे रक्षण करणे, त्यांच्या कर्माप्रमाणे त्यांना शुभाशुभ फळें भोगावयास लावणे व क्षेत्रांतून बाहेर हाकलणे हे याचे काम आहे. त्यांचे पूजन करावे. शेवटी मुख्य अशा महाद्वारी जाऊन, द्वारद्विभुज गणेशासह श्री मांजराई द्वारदेवतेचे पूजन व लक्ष्मीनारायणाचे पूजन करावें. याला धर्मद्वार असें म्हणतात. हे द्वार नग्नभरवापासून २ मैलांवर आहे. द्वारदेवतेचे पूजन झाल्यानंतर त्याच रस्त्याने परत यावे. कऱ्हागंगेवर स्नान करून देवालयातील मयूरेशाचे दर्शन घ्यावे व पहिल्या दिवसाची द्वारयात्रा संपवावी. अशा प्रकारे दररोज चार स्नाने करावी लागतात.

          दुसऱ्या दिवशी दक्षिण दिशेची द्वारयात्रा साधावी. नित्यस्नान, संध्या, नित्ययात्रा केल्यावर प्रथम स्नान, मयूरेशाचे पूजन, पुन्हां स्नान असे करत तेथून १.५ मैल दक्षिणेस असणाऱ्या गणेशगणांसह मुख्य गण मोद-प्रमोद यांचे स्थानी जावे. त्यांच्या दर्शनाने क्षेत्रामध्ये राहणाऱ्यांच्या अनेक संकटांचा नाश होतो. नंतर तेथून १.५ मैलांवर भगवान् श्रीनीलकण्ठेश्वर शंकराचे स्थान आहे. ह्यांच्या दर्शनाने विषबाधा दूर होते, असा अनुभव आहे. तेथून ४ मैलांवर शंकर व पार्वती यांचे स्थान आहे. तेथे एक द्विभुज गणेश असून त्याच्या मांडीवर विरजा नामक शक्ति आहे. या द्वाराने अर्थप्राप्ति होत असल्यामुळे या द्वारास ‘अर्थद्वार’ असें म्हणतात. नंतर परत येऊन स्नान करून मयूरेशाचे पूजन करावे.

          तिसऱ्या दिवशींच्या यात्रेस “पश्चिमद्वार यात्रा” म्हणतात. मयूरेशाच्या पश्चिमेस २.५ मैलांवर भगवतीदेवी व श्रीसिद्धिमाता हिचे स्थान असून संपूर्ण नवकोटि सिद्धीसह, अष्टमहासिद्धींसह  जगदंबा येथे विराजमान आहे. हिच्या कृपेने सर्व प्रकारची सिद्धि प्राप्त होते. येथून पुढे नंतर ३ मैलांवर कृत्तिवासेश्वर शंकराचे स्थान आहे. जादूटोणा, अभिचार कर्म यांपासून ह्याच्या कृपेनें भक्तांची सुटका होते. तेथून ५ मैलांवर रतिमदनासह भगवती आदिशक्ति भुवनेश्वरी असून येथे आश्रयाशक्तीसह द्विभुज गणेश राहतात. हे क्षेत्राचे नाव ‘कामद्वार’ असून या द्वारयात्रेने सर्व प्रकारच्या कामना पूर्ण होतात. नंतर परत देऊन मयुरेश्वराचे दर्शन करावे.

             चौथ्या दिवशींच्या यात्रेस “उत्तरद्वार यात्रा” म्हणतात. प्रथम नित्याप्रमाणे क्रम झाल्यावर मयूरेशाच्या उत्तरेस २.५ मैलावर गर्भगृहद्वारी देवी योगिनीचे मूळ स्थान असून त्या मूळ चौसष्ठ देवता होत्या, पण हल्ली दोनच आहेत. या सकल ऐश्वर्य देतात. पुढे ३ मैलांवर देवगृहद्वारी भीमेश्वर शंकराचे स्थान असून यांच्या कृपेने गेलेले ऐश्वर्य परत मिळते. पुढे ४ मैलांवर महीदेवीसह वराह आणि श्री सूर्य राहत असून मुक्तिदेवीसह द्वारद्विभुजगणेश राहतात. हे क्षेत्राचे ‘मुक्तिद्वार’ म्हणून मानले जाते. या द्वारयात्रेने साधकास निश्चितपणे मुक्ति मिळते. असे हे प्रत्येक द्वाराचे टप्पे असून मध्यभागी देवी श्रीकऱ्हेच्या दक्षिण तीरावर श्रीमोरेश्वर भगवान भक्तकामप्रपूरक मोठ्या आनंदानें निवास करतो. श्रीब्रह्मकमंडलू गंगेत (कऱ्हेत) श्रीगणेशकुंड हे महान तीर्थ असून ते सर्वश्रेष्ठ गणेशतीर्थ समजले जाते.

          द्वारयात्रा करणाऱ्यांनी चारीही दिवस उपवास करावा. ही द्वारयात्रा करावयाची इच्छा असून अंगी शक्ति नसली तर आपण वाहनांत बसून यात्रा साधावी. उपोषणादि नियम आपण स्वतः पाळावेत.